ಚಿಕ್ಕನಾಯಕನಹಳ್ಳಿ: ಶನಿವಾರ ಪಟ್ಟಣದ ಮುಖ್ಯರಸ್ತೆಯ ಬದಿಯಲ್ಲಿನ ಪಾದಚಾರಿ ಮಾರ್ಗದ ಅಕ್ರಮ ಅತಿಕ್ರಮಣಗಳನ್ನು ತೆರವು ಕಾರ್ಯಾಚರಣೆ ನಡೆಯಿತು.
ಪಟ್ಟಣದಲ್ಲಿ ಹಾದುಹೋಗುವ ಹೆದ್ದಾರಿಯ ಪಾದಚಾರಿ ಮಾರ್ಗದಲ್ಲಿನ ಅತಿಕ್ರಮಣಗಳ ತೆರವುಗೊಳಿಸಲು ಪುರಸಭಾ ಅಧಿಕಾರಿವರ್ಗ, ಸಿಬ್ಬಂದಿ, ಪೌರಾರ್ಮಿಕರು, ಟ್ರ್ಯಾಕ್ಟರ್‌ಗಳು ಹಾಗೂ ಜೆಸಿಬಿಯಂತ್ರದೊಂದಿಗೆ ಪಾದಚಾರಿ ಮಾರ್ಗದ ಅತಿಕ್ರಮಣದ ತೆರವು ಕಾರ್ಯಾಚರಣೆಗೆ ಇಳಿದವು.
ಪಟ್ಟಣದೊಳಗೆ ಹಾದುಹೋಗುವ ಮುಖ್ಯರಸ್ತೆಯ ಕೆನರಾಬ್ಯಾಂಕ್, ಖಾಸಗಿ ಬಸ್ ನಿಲ್ದಾಣ, ನೆಹರೂವೃತ್ತದ ಕರ್ನಾಟಕ ಬ್ಯಾಂಕ್, ಸರ್ಕಾರಿ ಬಸ್ ನಿಲ್ದಾಣದ ಸನಿಹ ಕೆಲವು ಭಾಗದ ಜನಸಂಚಾರ ಜಾಗಗಳು ವ್ಯಾಪಾರಿಗಳಿಂದ ಅತಿಕ್ರಮಣಗೊಂಡ Pಪರಿಣಾಮ ಪಾದಚಾರಿಗಳು ರಸ್ತೆಯಲ್ಲಿಯೇ ಜೀವವನ್ನು ಕೈಹಿಡಿದುಕೊಂಡು ಓಡಾಡುವ ಸ್ಥಿತಿಯಿತ್ತು. ಈ ಅತಿಕ್ರಮಣದಿಂದಾಗಿ ದ್ವಿಚಕ್ರವಾಹನಗಳನ್ನು ಸಹ ಬೇಕಾಬಿಟ್ಟಿಯಂತೆ ರಸ್ತೆಯಲ್ಲಿಯೇ ನಿಲ್ಲಿಸುವ ಪರಿಣಾಮ ಹಲವು ಅಪಘಾತಗಳು ಸಂಭವಿಸಿತ್ತು.
ಇದರ ಜೊತೆಗೆ ರಸ್ತೆಬದಿಯಲ್ಲಿನ ಗೂಡಂಗಡಿಗಳಾದ ವಿವಿಧ ಮಾದರಿಯ ಉಪಹಾರದಅಂಗಡಿ, ಹಣ್ಣಿನ ಅಂಗಡಿ, ಫಾಸ್ಟ್‌ಫುಡ್, ತರಕಾರಿ ಇನ್ನಿತರ ಸಂಚಾರಿ ಅಂಗಡಿಗಳು ದಿನೇದಿನೇ ರಸ್ತೆಯ ಬದಿಯಲ್ಲಿ ಹೆಚ್ಚುತ್ತಲೇ ಇರುವುದು ಭಯಮುಕ್ತ ಜನಸಂಚಾರಕ್ಕೆ ಕಾರಣವಾಗಿತ್ತು. ಹಲವು ದಿನಗಳಿಂದ ಈ ತೆರವು ಕಾರ್ಯಾಚರಣೆಯ ವದಂತಿ ಹರಡಿದ್ದರೂ ಕಾರ್ಯಾಚರಣೆ ನಡೆದಿರಲಿಲ್ಲ, ಇದರ ಅಂಗವಾಗಿ ಸಾರ್ವಜನಿಕ ತಿಳುವಳಿಕೆ ನೀಡಲಾಗಿತ್ತು. ಶನಿವಾರ ನಡೆದ ಕಾರ್ಯಾಚರಣೆಯಲ್ಲಿ ಮುಖ್ಯರಸ್ತೆಯ ಬದಿಯ ಪಾದಚಾರಿ ಮಾರ್ಗದ ಇಕ್ಕೆಲಗಳ ವ್ಯಾಪಾರಸ್ತರು ತಮ್ಮ ಅನುಕೂಲಕ್ಕಾಗಿ ಚರಂಡಿ ಮೇಲೆ ನಿರ್ಮಿಸಿದ ಸಿಮೆಂಟ್ ಮೆಟ್ಟಿಲುಗಳನ್ನು ಜೆಸಿಬಿ ಮೂಲಕ ಕಿತ್ತುಹಾಕಲಾಯಿತು. ಈ ಕಾರ್ಯಾಚರಣೆಯಲ್ಲಿ ಪೊಲೀಸ್ ಸಿಬ್ಬಂದಗಳ ಸಹಕಾರ ಪಡೆಯಲಾಗಿತ್ತು.
ಹೆದ್ದಾರಿಯಲ್ಲಿ ಸಾರ್ವಜನಿಕರ ಸಂಚಾರಕ್ಕೆ ಅಡ್ಡಿಯಾಗುವ ಯಾವುದೇ ಅತಿಕ್ರಮಣಗಳನ್ನು ಮುಲಾಜಿಲ್ಲದೆ ತೆರವುಗೊಳಿಸಲಾಗುವುದೆಂದು ಮುಖ್ಯಾಧಿಕಾರಿ ಶ್ರೀಮತಿ ಮಂಜಮ್ಮ ತಿಳಿಸಿದರು. ಪಟ್ಟಣದಲ್ಲಿ ಹಾದುಹೋಗುವ ಮುಖ್ಯರಸ್ತೆಯ ಇಕ್ಕೆಲಗಳ ಅತಿಕ್ರಮಣದಿಂದ ಸಾರ್ವಜನಿಕರ ಓಡಾಟಕ್ಕೆ ಹೆಚ್ಚು ತೊಂದರೆಯಾಗುತ್ತಿರುವ ಜಾಗಗಳಲ್ಲಿ ತೆರವುಕಾರ್ಯಾಚರಣೆ ಸಂಪೂರ್ಣವಾಗಿ ಮಾಡಲಾಗುವುದು, ರಸ್ತೆಬದಿಯಲ್ಲಿ ನಿಲ್ಲಿಸಿ ವ್ಯಾಪಾರ ಮಾಡುವ ಸಂಚಾರಿ ಅಂಗಡಿಗಳಿಂದ ಜನರ ಓಡಾಟಕ್ಕೆ ಕಿರಿಕಿರಿಯಾಗುವ ಅಂಗಡಿಗಳ ಸ್ಥಳಾಂತರಕ್ಕೆ ಕ್ರಮ ಕೈಗೊಳ್ಳಲಾಗುವುದು ಹಾಗೂ ಪುರಸಭೆ ಜಾಗದಲ್ಲಿ ಅನಧಿಕೃತವಾಗಿ ಇಟ್ಟಿರುವ ಅಂಗಡಿಗಳನ್ನು ತೆರವುಗೊಳಿಸಲಾಗುವುದೆಂದರು.
